Málið hófst í desember þegar skemmdarverk voru unnin á tæplega 300 bílum í mörgum þýskum borgum. Var umhverfisverndarsinnum kennt um. Hafði byggingarkvoðu verið sprautað inn í útblástursrör bílanna þannig að þeir voru ónothæfir.
Skemmdarvargarnir settu límmiða á bílana með slagorðum á borð við „verið grænni“ og mynd af Robert Habeck, sem er varakanslari Þýskalands og efnahags- og umhverfisráðherra og þingmaður Græningja. Hann stefnir á að verða kanslari eftir þingkosningarnar þann 23. febrúar.
Der Spiegel segir að málið hafi tekið algjörlega nýja stefnu í desember þegar þrír menn voru stöðvaðir af lögreglunni skammt frá Berlín. Þeir eru frá Þýskalandi, Serbíu og Bosníu-Hersegóvínu. Við leit heima hjá þeim fann lögreglan brúsa með byggingarkvoðu, farsíma og fartölvur.
Rannsóknin leiddi í ljós að þeir höfðu fengið 100 evrur greiddar fyrir hvern bíl sem þeir skemmdu og að útsendarar rússnesku leyniþjónustunnar FSB höfðu ráðið þá til starfa í gegnum skilaboðaþjónustur á borð við Telegram og Viper.
Einn mannanna játaði að þeim hefði verið lofað mörgum þúsund evrum fyrir skemmdarverkin og að rússneskur tengiliður hefði haft milligöngu um þetta.
Þýska leyniþjónustan og Boris Pistorius, varnarmálaráðherra, höfðu áður varað við hættunni á að Rússar reyni að hafa áhrif á þingkosningarnar með skemmdarverkum og dreifingu áróðurs og lyga. Markmiðið sé að skaða lýðræðið og grafa undan stuðningi við Úkraínu.
Áður hafa bandarísk yfirvöld afhjúpað hvernig Rússar blönduðu sér í forsetakosningarnar þar í landi 2016 með því að dreifa lygum og röngum upplýsingum en með þessu lögðu þeir sitt af mörkum til að Donald Trump sigraði í kosningunum.
Rússar reyndu einnig að hafa áhrif á frönsku forsetakosningarnar 2017 og þjóðaratkvæðagreiðsluna í Bretlandi 2016 um Brexit.
