LED bílljós í ýmsum nýjum bílum virðast vera að gera marga ökumenn mjög reiða. Er jafn vel talað um að þessi nýju ljós séu beinlínis hættuleg og að þau virki eins og háu ljósin.

„Að keyra á móti þessum bílum er næstum því blindandi, sérstaklega í myrkri,“ segir íslenskur ökumaður á samfélagsmiðlinum Reddit. Á hann þá við bíla með LED ljósabúnað, einkum nýja bíla eins og Tesla, Audi og BMW. „Ég þarf stundum um hábjartan dag að fella niður baksýnisspegil út af birtu út af þessum björtu ljósum. Eru enginn lög um ljósabúnað á Íslandi? Er ekkert eftirlit?“ spyr hann.

Er hann ekki einn um þetta og hefur skapast mikil umræða.

„Þetta er óþolandi, og gefur líka LED perunni slæmt orð. Skil ekki hvernig svona stór fyrirtæki fara að því að gera þetta svona fokking illa,“ segir einn netverji í athugasemdum.

Annar nefnir að bílaframleiðendurnir geri þetta beinlínis viljandi. Það er að hafa hátt stillt framljós gefi bílnum beittara útlit.

„Vanhæfni og aðgerðarleysi stjórnvalda er algjört. Bláa ljósið frá led perum er miklu meira skerandi þótt lumensin séu svipuð og glóperur og innan löglegra marka,“ segir einn og segir lausnina geta verið þá að lækka lúmen (mælieining fyrir ljósflæði) LED pera. Segist hann hafa mætt lögreglubílum sem eru með svona ljós. „Mætti à Vesturlandsveginum að nóttu til löggubíl ùr hinni áttinni sem var með kveikt à risa flóðlýsingu og ekkert að pæla ì hættunni sem stafar frá því. Ljósmagnið var gjörsamlega súrrealískt og vægast sagt algjört overkill,“ segir hann.

Nefnt er að þessi framljós séu það björt að það sé eins og bílarnir séu með háu ljósin á. Stórhættulegt sé að mæta þeim.

Umræðan er alls ekki bundin við Ísland. Á sama samfélagsmiðli er til að mynda heill umræðuhópur um óþarflega björt framljós bíla þar sem rætt er um skaðsemina og lögmæti þessara pera.