Í leynilegri upptöku sem Logi Bergmann gerði af símtali sínu við Arnar Grant segist hann aldrei hafa snert Vítalíu Lazarevu. Arnar Grant samsinnir honum. Mannlíf greinir frá.
Logi missti starf sitt sem þáttarstjórnandi og pistlahöfundur hjá Árvakri í kjölfar þess að Vítalía sakaði hann um kynferðisbrot. Það gerði hún í hlaðvarpsviðtali við Eddu Falak í byrjun árs 2022. Meint kynferðisbrot er sagt hafa átt sér stað í kjölfar þess að Logi kom að Vítalíu og Arnar í ástaratlotum inni á herbegi á Hótel Hamri í Borgarnesi. Sagði hún Loga hafa brotið gegn sér með leyfi Arnars.
Á upptökunni lýsir Logi yfir sakleysi sínu og Arnar samsinnir honum. „Þetta meikar bara engan sens, Logi. Þú myndir aldrei fara niður á grátandi stelpu. Sama þótt ég myndi biðja þig um það. Þú myndir aldrei gera það,“ segir Arnar á upptökunni.
„Mér hefur verið sagt upp fyrir sakir sem eru ekki sannar. Ég hef aldrei snert þessa konu. Ég mun ábyggilega einhvern tímann fara í mál við Moggann, eða eitthvað,“ segir Logi á upptökunni.
„Ég er búinn að hugsa þetta hundrað sinnum. Ég hefði átt að láta einhvern hótelstarfsmann tékka á ykkur en ég hafði bara áhyggjur af ykkur, hvort það væri eitthvað að,“ segir Logi ennfremur.
Arnar tekur undir þetta og segir: „Ég var búinn að segja við ykkur að ég væri eitthvað slappur og ætlaði upp á herbergi,“ samsinnir Arnar.
„Ég hélt bara að þú hefðir fengið hjartaáfall eða eitthvað,“ segir Logi og Arnar segist skilja það.
„Ég geng inn á ykkur, ég tala við ykkur, ég fer. Það er ekkert sem gerist,“ segir Logi ennfremur og Arnar samsinnir því.
Arnar segir á upptökunni að Vítalía hafi um þetta leyti verið að fjárkúga fjórmenningana sem voru með henni naktir í heitum potti og hún sakaði um áreitni. „Hún var að reyna að fjárkúga strákana. Þegar hún fer í þetta viðtal er hún búin að vera í miklum samningaviðræðum við þá með upphæð sem ætti að borga henni,“ segir Arnar og segir að ekki hafi gengið saman með þeim og þess vegna hafi hún farið í viðtalið til Eddu.
Logi segir ennfremur í upptökunni að Vítalía hafi leitt sig í gildru:
Hún hefur allt í einu samband við mig. Þá varst þú búinn að segja mér að vera bara auðmjúkur, eitthvað og biðjast afsökunar á að hafa vaðið inn (í herbergið) og vera dónalegur við hana í samskiptum. Þá veiðir hún mig, þá nappar hún mig. Það sem er svo óþægilegt er að hún byrjar að setja samskipti hérna út í loftið. Hún byrjar að fá játningu hjá mér. Þá er hún ekki að tala um Borgarnes. Þegar hún er komin með játninguna frá mér þar sem ég segist taka ábyrgð, þá byrjar hún að tala um Borgarnes. Það var planað hjá henni.“
Upptakan sem Mannlíf hefur undir höndum var lögð fram í kærumáli á hendur Vítalíu fyrir fjárkúgun. Rannsókn málsins var feld niður. Mannlíf boðar frekari fréttaflutning úr upptökunni.
