Svandís Ásta varð fyrir hræðilegri og gjörsamlega tilefnislausri árás á laugardagskvöld. Ókunnugur maður, sem hún sá ekki framan í, rak henni bylmingshögg í andlitið.

Sjúkrabíll kom á vettvang og fór með hana á bráðamóttökuna. „Ég rotaðist og vaknaði við að sjúkrafluningamennirnir voru að reyna að reisa mig á fætur,“ segir Svandís. Hún greinir frá málinu á Facebook og biður þá sem mögulega hafa orðið vitni að árásinni að hafa samband við lögreglun á höfuðborgarsvæðinu og koma upplýsingum þangað.

„Ég var stödd á Mónakó á Laugavegi og var á leiðinni út í sígó þegar ég fékk bara allt í einu hnefa í andlitið og rotaðist. Höggið var svo fast að framtönn í mér brotnaði í tvennt,“ segir Svanhvít í samtali við DV.

Svandís er einnig tognuð á öxl eftir árásina þar sem hún lenti á henni í fallinu og getur hún varla hreyft hægri höndina.

„Það er hægt að fara í sígó bak við hús í sundinu þarna og ég var á leiðinni þangað en um leið og gekk út fékk ég högg í andlitið. Ég sá ekki hver gerði þetta og bara rotaðist samstundis. Höndin skaust bara fyrir hornið og framan í mig. Svo man ég ekki fyrr en sjúkraflutningamennirnir komu.“

„Vinur minn er að spyrjast fyrir á Mónakó um hvort einhver hafi orðið vitni að þessu,“ segir Svandís. Hún segist ætla að kæra árásina til lögreglu strax eftir helgi og biður þá sem gætu haft upplýsingar um málið að hafa einnig samband við lögregluna.

Síminn hjá lögreglunni á höfuðborgarsvæðinu er 444 1000.