Héraðsdómur Vestfjarða hefur sakfellt skipstjóra fiskiskips fyrir að hafa siglt skipinu undir áhrifum áfengis. Skipstjórinn játaði brot sitt og sýndi iðrun en þetta er í annað sinn sem hann er dæmdur fyrir slíkt brot.

Miðað við lýsingar á skipinu í dómnum virðist ljóst að um smábát er að ræða sem skilgreindur er sem fiskiskip út frá lagalegum forsendum.

Skipstjórinn var ákærður fyrir að hafa siglt til hafnar óhæfur til að stjórna bátnum með öruggum hætti vegna áhrifa áfengis. Þetta gerði hann síðastliðið sumar.

Skipstjórinn játaði brot sitt skýlaust. Í dómnum kemur fram að hann hafi verið dæmdur árið 2021 fyrir sama brot, að sigla skipi undir áhrifum áfengis. Fyrri dómurinn yfir manninum finnst ekki við leit á vefsíðu Héraðsdómstólanna.

Í þessum nýrri dómi segir að við ákvörðun refsingar yfir skipstjóranum sé horft til þess að þetta sé í annað sinn sem hann gerist sekur um brot af þessu tagi. Á móti verði hins vegar að líta til þess að hann hafi játað skýlaust og framvísað vottorði um að hann hafi gengist undir áfengismeðferð.

Hæfilegt þótti því að sekta skipstjórann um 200.000 krónur en þar sem sakir hans séu miklar skuli hann, í samræmi við ákvæði siglingalaga, vera sviptur skipstjórnarréttindum í fjóra mánuði. Honum er þó heimilt að gegna stöðu stýrimanns á meðan þessu tímabili stendur.