Samkvæmt áreiðanlegum heimildum DV er ákæra gegn Ástríði (Ástu) Kristínu Bjarnadóttur fyrir fjársvik í smíðum á ákærusviði Lögreglunnar á höfuðborgarsvæðinu og verður birt henni á næstu vikum.
Um eitt og hálf ár er liðið frá því Ásta var fyrst handtekin vegna gruns um stórfelld fjársvik gagnvart fjölmörgum karlmönnum, og meira en ár er liðið frá því hún losnaði úr 12 vikna gæsluvarðhaldi sem hún sat í megnið af sumrinu 2023.
Rannsókn lögreglu á málefnum Ástu leiddi meðal annars í ljós að á nokkurra ára tímabili lögðu hátt í 400 karlmenn samtals yfir 200 milljónir króna inn á reikninga hennar. Rannsóknin í fyrra beindist að meintum fjársvikum gagnvart 11 karlmönnum fyrir um 25 milljónir króna. En síðan hafa miklu fleiri meint fjársvik komið upp við áframhaldandi rannsókn.
Meint svik Ástu eru fólgin í því að fá lánaðar fjárhæðir án þess að greiða þær til baka og að komast með brögðum yfir rafræn skilríki manna og beita þeim til að millifæra fé og stofna til fjárskuldbindinga í þeirra nafni en færa féð sem fengið var að láni yfir á reikninga Ástu.
Hún er sökuð um að hafa nýtt sér veikleika brotaþola, andlega fötlun í sumum tilvikum en einmanaleika í öðrum tilvikum, en Ásta hefur hvað eftir annað sett sig í samband við karlmenn á einkamálasíðum og – forritum og óskað eftir lánum frá þeim.
Eftir að Ásta losnaði úr gæsluvarðhaldi í fyrrahaust hefur hún verið virk á bæði stefnumótaöppum og söluhópum á Facebook. Í söluhópunum hefur hún boðið ýmsan varning til sölu, t.d. snjallsíma og sjónvarpstæki.
