Regluheimili Frímúrarareglunnar við Bríetartún verður opnað almenningi á morgun, menningarnótt. Er þetta einstakt tækifæri til að sjá hvernig er þar innandyra en almenningi gefst jafnan ekki kostur á að skoða hús reglunnar.
Tilefnið er að í ár eru 100 ár frá því að fyrirrennari bókasafns reglunnar tók til starfa, bókasafn stúkunnar Eddu. Sett verður upp sýningin Frímúrarareglan söfn og saga þar sem sýndir verða ýmsir athyglisverðir munir reglunnar. Til dæmis bækur, myndir, skjöl og listaverk.
„Á sýningunni er saga þessi einnig rakin með myndrænum hætti á nýrri tímalínu sem sett hefur verið saman. Setur hún starfið í samhengi og er sjónræn leið þess að glöggva sig betur á sögu frímúrarastarfs á Íslandi,“ segir í tilkynningu frá Frímúrarareglunni.
Húsið verður opið á milli klukkan 11 og 15. Er fólk hvatt til að koma en Regluhúsið er mjög sjaldan opið fyrir almenning. Síðast gerðist það árið 2019 þegar 100 ár voru liðin frá fullgildingu stúkunnar Eddu. Þá mætti mjög mikið af fólki til að skoða sig um.
