„Dýrka að skólar séu að banna símanotkun. Finnst að allir grunnskólar ættu að drífa í þessu,“

segir Atli Fannar Bjarkason verkefnastjóri vefútgáfu og samfélagsmiðla á RÚV í færslu á Facebook.

Atli Fannar er á því að í kjölfarið ættum við að „líta á þessi tól eins og sígarettur þegar við föttuðum að þær eru skaðlegar; Fræðum, heftum aðgengi, bönnum innan 16 og hættum að hanga í símum í kringum börn.

Ef símarnir myndu valda krabbameini eins og sígaretturnar væri ekkert vesen að grípa til aðgerða en af því að vandamálin sem símar og samfélagsmiðlar skapa eru fyrst og fremst andleg þá nennir enginn að gera neitt.“

Færsla Atla Fannars hefur vakið mikla athygli og eru margir á sömu skoðun og hann. 

Söngvarinn Björgvin Halldórsson segir málið uppeldislegt: „Banna og ekki banna…Þetta byrjar allt í uppeldinu.“

Annar segir að skólakerfið ætti að „nýta tæknina og kenna krökkunum á uppbyggilega notkun á tækjunum, bæði með fræðslu og skemmtiefni til staðar. Reynslan hefur sýnt að það þýðir ekkert að spyrna við fótum þegar kemur að tækni og nýjungum, en best er að taka þetta í notkun og beina á rétta braut.“