Úkraínski herinn eyðilagði Su-57 herþotu, sem er fullkomnasta orustuþota Rússa, á laugardaginn. Það sem er sérstaklega athyglisvert við þetta er að vélin stóð á flugvelli í Akhtubinsk í Astrakhan í suðurhluta Rússlands, í um 600 km fjarlægð frá úkraínsku landamærunum.

Þetta er í fyrsta sinn sem Úkraínumönnum hefur tekist að eyðileggja flugvél af þessari tegund. Vélin er fullkomnasta orustuþota Rússa og er meðal annars illsjáanleg á ratsjám.

Úkraínski herinn birti gervihnattarmyndir á sunnudaginn sem sýna afrakstur árásarinnar á flugvöllinn. Ein myndanna sýnir sótugt malbik og litla sprengigíga í steypunni í kringum flugvélina.

Ekki er vitað hvaða vopn Úkraínumenn notuðu við árásina en miðað við fjarlægðina þá má reikna með að drónar hafi verið notaðir.

Þeir hafa bætt vel í framleiðslu sína á drónum sem þeir geta notað til árása langt inni í Rússlandi. Þeir hafa meðal annars ráðist á gasstöð í Sankti Pétursborg, um 1.000 km frá úkraínsku landamærunum.