Breska ríkisstjórnin var meðal þeirra ríkisstjórna sem gripu til refsiaðgerða gegn Rússlandi í kjölfar innrásarinnar í Úkraínu. Hún bannaði meðal annars sölu á bílum, sem kosta meira en 42.000 pund, til Rússlands.
The Times segir að breskir lúxusbílar, sem kosta meira en þetta, séu enn seldir í Rússlandi og að þar gegni nágrannaríki landsins mikilvægu hlutverki.
Bílarnir eru framleiddir í Bretlandi, því næst eru þeir settir í skip í breskum höfnum og siglt með þá til Aserbajsan, Kasakstan, Armeníu eða Belarús. Þar eru bílarnir skráðir og síðan taka Rússar eða útsendarar þeirra við þeim og flytja þá beint til Moskvu eða St Pétursborgar þar sem þeir eru seldir. Eru þeir seldir á sem nemur allt að 100 milljónum íslenskra króna.
Það er hægt að sjá hversu margir bílar eru fluttir eftir þessari leið til Rússlands með því að skoða tölur frá fyrri árum um sölu á bílum. Árið 2021 voru 20 Jaguar Land-Rover bílar seldir til Kasakstan. 2022 voru þeir 321 og á síðasta ári voru þeir 1.058.
Svipuð þróun átti sér stað í Aserbajsan. Sky News segir að á síðasta ári hafi breskir bílaframleiðendur selt bíla þangað fyrir 273 milljónir punda en það er 1.860% aukning frá því fimm árum áður en Rússar réðust inn í Úkraínu. Sky News segir að breskir bílaframleiðendur haldi því fram að þessi aukning tengist innrásinni ekki neitt.
The Times hefur eftir sérfræðingum að Vladímír Pútín, forseti, græði líklega háar fjárhæðir á innflutningi bresku bílanna vegna tolla og virðisaukaskatts. Þessir peningar séu síðan notaðir til að fjármagna stríðið í Úkraínu.