Póstboxum hefur verið komið fyrir í þremur strætisvögnum á höfuðborgarsvæðinu og er það hluti af tilraunaverkefni Póstsins og Strætó. Markmiðið er að auka aðgengi íbúa höfuðborgarsvæðisins að þjónustu Póstsins og gera flutning á pökkum hagkvæmari og umhverfisvænni.
„Við erum afar spennt fyrir þessu samstarfi með Strætó,“ segir Vilborg Ásta Árnadóttir, markaðsstjóri Póstsins. „Við teljum að það séu mikil samlegðaráhrif til staðar í þessu verkefni þar sem samgöngunet Strætó nær yfir allt höfuðborgarsvæðið og vagnar eru á ferðinni frá morgni til kvölds. Við erum stöðugt á höttunum eftir hentugri staðsetningu fyrir póstboxin okkar og þegar viðskiptavinur kom með þessa hugmynd fannst okkur tilvalið að láta á þetta reyna.“
Til að byrja með hefur póstboxum verið komið fyrir í vögnum á leiðum 3, 4 og 12 sem eiga allar viðkomu í Mjódd. Upplýsingar um tímatöflu leiðarinnar birtast á Mínum síðum Póstsins og í Póst-appinu. „Viðskiptavinir geta stokkið inn í vagninn á sinni stoppistöð og sótt pakkann sinn. Það verður svo hægt að fylgjast nákvæmlega með ferðum pakkans í Póst-appinu,“ bætir Vilborg við.
Til að fagna þessu nýja samstarfsverkefni verður búið að koma fyrir óvæntum glaðningi í nokkrum hólfum í strætóboxunum. Til að eiga möguleika á því að fá glaðning þarf að breyta um afhendingarstað á Mínum síðum eða í appinu. „Þau sem vilja prófa þessa mögnuðu nýjung þurfa einungis að skrá sína strætóleið sem afhendingarstað á Mínum síðum á vefnum okkar eða í Póst-appinu. Nútímafólk er alltaf á hraðferð, hver vill ekki geta slegið tvær flugur í einu höggi og sótt pakkann sinn á fleygiferð um bæinn?” segir Vilborg.
