Tónlistarkonan Elín Hall, sem átti sæti í dómnefnd Söngvakeppni sjónvarpsins ásamt sex kollegum sínum, virðist vera ein þeirra sem er ósátt við niðurstöðu keppninnar. Aðfaranótt sunnudags birti Elín tvær færslur á Instagram-reikningi sínum sem gaf það til kynna. Önnur færslan var skjáskot af flutningi Bashar Murad á laginu Wild West og hin var skjáskot af Twitter-færslu þar sem hvatt var til þess að Eurovision-keppnin í ár yrði sniðgengin.

Sitt sýnist hverjum um úrslit Söngvakeppni sjónvarpsins og er enn deilt um endanlega niðurstöðu keppninnar. Hera Björk Þórhallsdóttir bar sigur úr býtum með laginu Scared of Heights en Bashar þurfti að sætta sig við annað sæti. Greint var frá því í gær að Einar Hrafn Stefánsson, höfundur silfurlagsins, hefur farið fram á sjálfstæða rannsókn óháðs aðila á framkvæmd kosninga í keppninni í gærkvöld. Leikur grunur á að hluti af atkvæðum sem renna áttu til Bashars hafi farið til Heru Bjarkar og vill höfundur lagsins fá úr því skorið hvort það hafi haft áhrif á endanlega niðurstöðu.

Þá er farið að bera á þrýstingi um að Hera Björk stígi til hliðar og leyfi Bashar og aðstandendum Wild West að vera framlag Íslands í Eurovision þetta árið. Samtöðin greinir frá því á samfélagsmiðlum hafi ýmsir netverjar gengist við því að senda söngkonunni skilaboð þar sem hún er hvött til þess að gefa sætið eftir.