CNN skýrir frá þessu og vísar í bók Sciutto, sem heitir „The Return of Great Powers“, sem kemur út núna í dag. Á grundvelli upplýsinga frá heimildarmönnum, sem standa Joe Biden Bandaríkjaforseta nærri, skýrir hann frá því að Bandaríkjamenn hafi undirbúið sig undir það sem þótti „óhugsandi“.
Bandaríkjamenn höfðu fengið fjölda upplýsinga um að Vladímír Pútín, Rússlandsforseti, myndi þrýsta á hnappinn skelfilega og skjóta kjarnorkusprengju á Úkraínu.
„Þetta var ekki bara kenning. Þetta byggðist á upplýsingum sem við fengum,“ sagði einn heimildarmanna Sciutto og annar sagði: „Við neyddumst til að skipuleggja þetta þannig að staða okkar væri eins góð og hægt væri ef það sem ekki var lengur óhugsandi myndi gerast.“
Ástæðan fyrir þessum fyrirætlunum Pútíns var að Úkraínumönnum gekk vel á vígvellinum sumarið 2022. Þeir höfðu sótt hart að Rússum, sérstaklega í Kherson, og hrakið þá frá herteknum svæðum.
Nú er staðan önnur og það eru Rússar sem eru með yfirhöndina og hafa unnið nokkra smásigra að undanförnu.