Hann skrifar grein sem birtist í Morgunblaðinu í dag þar sem hann svarar fyrir þá gagnrýni sem fyrirtækið hefur fengið á sig. Hefur ítrekað verið kallað eftir því að fólk sniðgangi fyrirtæki sem nýta sér þjónustu Rapyd og hafa einhver skipt um greiðslumiðlun.
„Að undanförnu hefur fámennur hópur fólks haft sig mikið í frammi um Rapyd. Rangfærslur í málflutningi þessa hóps hvað varðar Rapyd eru margar. Þeim verður ekki öllum svarað hér. Fullyrðingar eins og að Rapyd starfi á landránsbyggðum Ísraels á Vesturbakkanum og styðji hernað Ísraelshers á Gasa eru alrangar,“ segir Garðar í grein sinni þar sem hann kveðst vilja koma ákveðnum atriðum á framfæri.
„Rapyd á Íslandi er íslenskt fyrirtæki byggt á áratuga sögu rekstrar Valitor og Korta, sem nú hafa verið sameinuð undir merkjum Rapyd. Fyrirtækið starfar sem íslenskt hlutafélag og er kennitala félagsins frá 1983. Hjá Rapyd á Íslandi starfa um 180 einstaklingar. Félagið greiðir skatta og skyldur á Íslandi,“ segir hann.
Þá segir hann að Rapyd á Íslandi leggir metnað sinn í að þjónusta íslenskt samfélag með því að veita fyrsta flokks greiðslumiðlun. Þannig hafi Rapyd á Íslandi lengi lagt áherslu á að gefa til samfélagsins enda eigi það djúpar rætur í íslensku samfélagi.
Garðar bendir á að Rapyd á Íslandi sé í eigu alþjóðlega fjártæknifyrirtækisins Rapyd og starfi undir merkjum þess. Þá sé fyrirtækið er með starfsstöðvar um allan heim; í Bandaríkjunum, Bretlandi, Hollandi, Íslandi, Ísrael, Dúbaí, Singapúr og Hong Kong, svo dæmi séu tekin. Nefnir hann að fyrirtækið sé að mestu í eigu alþjóðlegra fjárfestingarsjóða sem hafi aðsetur víða um heim.
„Eigendur Rapyd á Íslandi hafa fjárfest ríkulega hér á landi. Frá aðkomu Rapyd að félaginu hefur félagið aldrei greitt arð til eigenda sinna. Félagið er því ekki með nokkru móti að styðja hernað Ísraelshers, eins og ranglega hefur komið fram í fullyrðingum ofangreinds hóps,“ segir hann og heldur áfram:
„Átökin fyrir botni Miðjarðarhafs og mannfall almennra borgara eru hörmungar sem snerta okkur öll. Það á jafnt við um starfsmenn Rapyd sem aðra. Átökin og rót þeirra eru flókin, tilfinningaþrungin og um margt sorgleg. Af þeim ástæðum hefur Rapyd á Íslandi ekki talið rétt að blanda sér í umræðuna fyrr en nú. Ítrekaðar rangar fullyrðingar um Rapyd í fjölmiðlum hafa knúið mig til að svara,“ segir Garðar og endar grein sína á þessum orðum:
„Að gefnu tilefni vil ég árétta að félagið tengist átökunum ekki á nokkurn hátt. Ég get fullyrt að starfsmenn félagsins taka hörmungarnar nærri sér eins og aðrir og óska þess að átökunum linni. Óska ég þess að fólk sem kennir sig við mannréttindi og talar fyrir mannúð kynni sér staðreyndir um rekstur Rapyd á Íslandi áður en röngum fullyrðingum er haldið fram í fjölmiðlum.“
