Þann 13. nóvember síðastliðinn var kona sakfelld fyrir friðhelgisbrot í Héraðsdómi Norðurlands eystra. Dómurinn var birtur í dag en mbl.is greindi fyrst frá.
Kona var ákærð fyrir að hafa laugardaginn 22. júlí árið 2023 brotið gegn friðhelgi einkalífs fyrrverandi eiginmanns síns með því að skrá sig inn á Snapchat-aðgang hans, hafa fundið þar mynd af honum þar sem hann lá slasaður í blóði sínu á heimili sínu og dreift myndinni með ósmekklegum athugasemdum til vina og fjölskyldumeðlima mannsins. Var hún auk þess í samskiptum við þetta fólks þar sem hún þóttist vera eiginmaðurinn.
Konan sótti ekki réttarhöldin þó að henni hafi verið birt fyrirkall. Var hún því dæmd að henni fjarstaddri. Var hún sakfelld fyrir friðhelgisbrot.
Í dómnum kemur fram að konan er með hreinan sakaferil. Var refsing hennar ákveðin 30 daga skilorðsbundið fanglesi.
Dóminn má lesa hér.
