Kynferðisbrot gegn börnum í gegnum samskiptamiðilinn Snapchat eru algeng. DV hefur nú undir höndum ákæru í slíku máli gegn manni sem ákærður er fyrir brot gegn blygðunarsemi og barnaverndarlögum, með því að hafa á tímabilinu 16.-19. apríl 2021 sent pilti, sem þá var 13 ára, mynd af getnaðarlim sínum í gegnum einkaskilaboð á Snapchat. Segir í ákæru að með þessu hafi ákærði sýnt drengnum ósiðlegt athæfi og háttsemin hafi verið til þess fallin að særa blygðunarsemi hans.
Héraðssaksóknari krefst þess að ákærði verði dæmdur til refsingar og greiðslu alls sakarkostnaðar.
Fyrir hönd brotaþola er krafist miskabóta að fjárhæð 800 þúsund krónur.
Aðalmeðferð í málinu verður við Héraðsdóm Norðurlands eystra á Akureyri þann 8. janúar næskomandi.
