Rannsóknarnefnd samgönguslysa hefur sent frá sér lokaskýrslu vegna slyss sem varð um borð í fiskiskipinu Frosta ÞH inni á Seyðisfirði í september síðastliðnum en þá fékk einn skipverja klór í augun. Með snarræði skipsfélaga hans tókst hins vegar að forða því að augun yrðu fyrir varanlegum skaða.
Um borð voru 12 skipverjar en þegar slysið varð var skipið inni á Seyðisfirði, í um 15 mínútna siglingar fjarlægð frá höfninni í samnefndum bæ, en skipverjar voru í miðjum klíðum við þrif.
Í skýrslunni kemur fram að slysið varð með þeim hætti að skipverjinn sem slasaðist var að hella klór í þvottakar að afloknum þrifum fyrir landlegu. Karið var tómt en svo illa vildi til að hann leit ofan í karið á meðan sjór var að renna í það. Klórblandaður sjór skvettist í augu hans en félagar mannsins náðu að koma honum strax til aðstoðar og hófu þegar í stað að skola augu hans. Skipinu var siglt strax af stað og var komið til hafnar á Seyðisfirði 15 mínútum síðar þar sem sjúkrabíll beið og kom skipverjanum undir læknishendur. Hann var óvinnufær í þrjá daga en hefur náð sér að fullu. Skipverjinn var ekki með hlífðargleraugu.
Segir í skýrslunni að eftir atvikið hafi um borð í Frosta verið settar reglur um notkun hlífðargleraugna auk þess að stútum í þvottakari var breytt á þann hátt að minni hætta væri á að vatn gæti skvest úr karinu. Skipstjóri Frosta hafi enn fremur tilkynnt atvikið samdægurs til rannsóknarnefndar samgönguslysa.
Um klórinn sem var notaður í umrætt sinn segir í skýrslunni að hann hafi verið af 15 prósent styrkleika og sé ætlast til að hann sé blandaður vatni. Á umbúðunum sé tekið fram að nota eigi augnhlífar, hlífðarhanska og hlífðarfatnað. Þegar slysið varð hafi klórnum verið hellt í tómt kar og blandan því sterkari á meðan sjó var hleypt á karið heldur en við hefðbundna notkun. Megi leiða líkum að því að það hafi aukið á alvarleika atviksins, auk þess sem skipverjinn hafi litið ofan í karið án augnhlífa á meðan sjór var að renna í það.
Niðurstöður skýrslunnar eru þær að notkun augnhlífa hefði að öllum líkindum komið í veg fyrir slysið. Skjót viðbrögð annarra skipverja og að hinum slasaða félaga þeirra var fljótt komið undir læknishendur sé stór þáttur í að ekki fór verr. Það beri að hrósa áhöfninni fyrir skjót viðbrögð og að skipstjóri tilkynnti atvikið eftir örstutta stund.
Að lokum er í skýrslunni þeim ábendingum komið á framfæri að við notkun ætandi eða eitraðra efna skuli alltaf nota þann hlífðarbúnað sem tækniblöð segi fyrir um.
