Skemmdir voru unnar á um tíu bifreiðum á Seltjarnarnesi um miðjan síðasta mánuð, en þær voru allar kyrrstæðar í bifreiðastæðum við Austurströnd þegar verknaðurinn átti sér stað.
Í tilkynningu frá lögreglu kemur fram að þarna hafi verið á ferðinni skemmdarvargur sem rispaði allar bifreiðarinar með einhvers konar áhaldi en mikið tjón hlaust af uppátæki viðkomandi.
„Svo virðist sem hinn óprúttni aðili hafi verið á ferðinni oftar en einu sinni, en bifreiðarnar, sem urðu fyrir barðinu á skemmdarvargnum, voru við Austurströnd 2-10.
Þau sem geta veitt upplýsingar um málið eru vinsamlegast beðin um að hafa samband við lögreglu í síma 444 1000, en upplýsingum má einnig koma á framfæri í tölvupósti á netfangið gudmundur.petur@lrh.is,“ segir lögreglan í tilkynningu sinni.
