Vinir og aðdáendur kattarins Diegó óttast nú að honum hafi verið rænt. Örvæntingafull leit stendur nú yfir af kettinum sem kallaður hefur verið frægasti köttur landsins. Diegó heldur sig nánast alfarið í Skeifunni, sérstaklega í verslunum A4 og Hagkaupa, og hefur unnið svo hug og hjörtu borgarbúa að tæplega 16 þúsund manns eru nú meðlimir í aðdáendasíðu hans á Facebook, sem ber heitið Spottaði Diegó.

En allt ætlaði um koll að keyra nú fyrir stundu þegar greint var frá því að einn meðlimur hópsins hefði séð ókunnugan einstakling með kött sem líkist Diego í strætisvagni á leið 14 nú fyrir stundu.

Aðdáendur voru fljótir að komast að því að Diegó væri ekki í uppáhalds verslunum sínum og stuttu síðar staðfesti eigandi kattarins, Sigrún Ósk Snorradóttir, að Diegó væri ekki heima hjá sér. Hvatti hún fólk til að láta vita inn í hópinn ef að Diegó sæist á vappi fyrir utan sitt venjulega umhverfi svo hægt væri að ná í hann.

Færsla þar sem auglýst er eftir kettinum landsfræga er í mikilli dreifingu þegar þessi orð eru skrifuð og ljóst að vinir kattarins munu leggja allt í sölurnar til að hafa uppi á honum.

Uppfært kl.22.15:

Einn meðlimur síðunnar hefur greint frá því að samkvæmt vagnstjóra hjá Strætó hafði það verið karlmaður sem er talinn hafa tekið Diegó. Maðurinn var svartklæddur, með bakpoka, stór heyrnatól og rauða húfu.