Ónefnd kona hefur verið ákærð fyrir ólögmæta nauðung og barnaverndarlagabrot. Í ákæru héraðssaksóknara í málinu hafa margar staðreyndir verið hreinsaðar úr ákærutexta en þar sem þinghald í málinu er ekki lokað má telja líklegt að meint ofbeldi konunnar hafi beinst gegn barni sem er henni ekki nákomið. Um þetta er þó ekki hægt að fullyrða.

Konan er sögð hafa veist með ofbeldi að dreng á leikvelli, dregið hann gegn vilja sínum frá leikvellinum og upp tröppur sem lágu að heimili hennar. Þar tókst drengnum að slíta sig lausan og hlaupa niður tröppurnar en konan elti drenginn, náði honum fyrir neðan tröppurnar, greip í hann og ýtti upp að vegg. Hélt hún honum við vegginn þar til hún varð þess vör að tvær manneskjur komu að.

Drengurinn hlaut í átökunum skrámur á hnúa vinstri handar, á olnboga og yfir hægra herðablað. Segir síðan í ákæru: „…með háttseminni sýndi ákærða drengnum yfirgang og ruddalegt athæfi auk ógnandi og vanvirðandi framkomu.“

Héraðssaksóknari krefst þess að konan verði dæmd til refsingar og greiðslu alls sakarkostnaðar.

Fyrir hönd drengsins er gerð krafa um miskabætur upp á 500 þúsund krónur.

Réttað verður yfir konunni í næstu viku, aðalmeðferð í málinu verður við Héraðsdóm Reykjavíkur þriðjudaginn 26. nóvember.