Verðbólgan í Rússlandi er nú komin á það stig að fólk er farið að stela smjöri og verslanir hafa þurft að grípa til aðgerða til að koma í veg fyrir slíkan þjófnað. Smjörþjófnaðurinn er merki um undirliggjandi vanda að sögn sérfræðinga.

Í rússneskum stórmörkuðum er smjör nú geymt hjá áfengi og tóbaki fyrir aftan afgreiðslukassann vegna mikils þjófnaðar á því. Smjör hefur hækkað um 25% í verði og sums staðar um 30% að sögn rússneskra fjölmiðla.

Smjörkrísan er dæmi um djúpan undirliggjandi vanda sem er tilkominn vegna þess að búið er að breyta efnahag landsins yfir í stríðsefnahag og því hafa nauðsynjavörur hækkað í verði.

Það eykur vandann að nær engar vestrænar fjárfestingar eiga sér nú stað í landinu og að ríkið dælir peningum í herinn og greiðir mönnum háar fjárhæðir fyrir að skrá sig í herþjónustu. Þetta hefur áhrif á laun í mörgum geirum og ekki dregur það úr vanda almennings að eldsneytisverð hefur einnig hækkað.

Samkvæmt opinberum tölum þá er verðbólgan um 8% en henni er haldið niðri með greiðslu styrkja í ýmsu formi. Vextir seðlabankans eru nú 19% og því er mjög dýrt fyrir fyrirtæki að taka lán.

Benjamin Hilgenstock, hjá Kyiv School of Economics, sagði í samtali við Jótlandspóstinn að til millilangs tíma litið séu horfurnar fyrir rússneskt efnahagslíf hræðilegar.

Hann vildi ekki gefa upp tímasetningu á hvenær rússneska hagkerfið hrynur en eins og staðan er núna, þá er landið á leið inn í krísutíma. Hann sagði að það gerist líklega 2026 og það muni þá hafa mikil áhrif á stríðið í Úkraínu.

„Tíminn vinnur gegn Rússlandi. Landið getur ekki haldið stríðsrekstrinum áfram á þessu stigi að eilífu. Það eru nokkrar ákveðnar takmarkanir fyrir Rússland, sem Rússar vita vel um, og það þýðir að Vesturlönd verða að gera Rússum lífið enn erfiðara og stytta tímann en um leið tryggja að Úkraína komist í gegnum næsta hálfa annað árið,“ sagði hann.