Heimildin greinir frá þessu á vef sínum.
Bent er á það í umfjöllun Heimildarinnar að Bjarni hafi sagt við mbl.is í gær að hann hafi rætt við ráðuneytisstjórann „fyrir nokkru síðan“ og við Vísi hafi hann sagst ekki muna hvort það hafi verið í síðustu eða þar síðustu viku.
Í frétt Heimildarinnar er vísað í svör ráðuneytisins við fyrirspurn miðilsins þar sem fram kemur að Bjarni hafi beint því til Bryndísar Hlöðversdóttur, ráðuneytisstjóra matvælaráðuneytisins, síðastliðinn fimmtudag að Jóni yrði haldið frá vinnu við hvalveiðileyfin.
Það gerðist sama dag og leyniupptaka af syni Jóns, Gunnari Bergmann, fór í dreifingu en í þeim talaði Gunnar fjálglega um fyrirætlanir föður síns um að gefa út leyfi fyrir hvalveiðum, helst fyrir kosningar, og vinasamband hans við Kristján Loftsson, forstjóra Hvals hf.
Bent er á það í umfjöllun Heimildarinnar að leyfisumsókn Hvals hafi borist 23. október, daginn áður en tilkynnt var um endurkomu Jóns á lista Sjálfstæðisflokksins og að hann yrði sérstakur fulltrúi Bjarna í ráðuneytinu. Fimmtán dagar hafi liðið frá því leyfisumsóknin barst frá Hval þar til Bjarni bað um að Jón kæmi ekki nálægt vinnslu hennar.
