Þórdís Kolbrún Reykfjörð Gylfadóttir, utanríkisráðherra, furðar sig á fréttum erlendu slúðurpressunnar um meint daður Danakonungs í hennar garð.

Hélt ástralska slúðurpressan því meðal annars fram að drottningin Mary, sem er Ástrali, hafi orðið reið og tárast þegar hún sá eiginmann sinn, Friðrik X Danakonung, daðra við Þórdísi á galakvöldverði fyrir íslensku forsetahjónin í Kristjánshöll, fyrr í þessum mánuði.

„Hin unga íslenska stjórnmálakona Þórdís, hún er mjög svo týpan hans,“ sagði danskur heimildarmaður ástralska miðilsins Now to Love sem fjallaði um málið í gær.

Sjá einnig: Segja dönsku drottninguna hafa tárast þegar konungurinn daðraði við Þórdísi 

Þórdís segir í samtali við Vísi að það sé hálfneyðarlegt að íslenskir fjölmiðlar hafi tekið þetta upp. Þetta sé engin frétt enda ekkert hæft í þessu.

„Ég hef alla tíð haft nokkra óbeit á þessari tegund fjölmiðla og hafði vonast til að við myndum halda okkur frá þessum standard frekar en að líta til hans og taka hann til fyrirmyndar,“ sagði Þórdís og tók fram að fjölmiðlar hafi stjórn á því hvað þeir telja vera frétt, en í þessu tilviki sé um engan fréttapunkt að ræða. Hún segist vonast til að íslenskri miðlar fjalli heldur um hvernig stjórnmálamenn standi vörð um hagsmuni Íslands á erlendri grundu, fremur en að elta slúðurfréttir sem þessa.