Dóra Björt Guðjónsdóttir, oddviti Pírata í borgarstjórn Reykjavíkur, býður sig fram í prófkjöri flokksins fyrir komandi Alþingiskosningar. Hún býður sig fram í Reykjavík.

„Eftir tilfinningastorm og hvirfilvind þungra þanka hef ég komist að þeirri niðurstöðu að ég ætla að gefa kost á mér til forystu Pírata á Alþingi og býð mig fram í Reykjavík. Ég held að reynsla mín, orka og eldmóður muni gagnast á leið okkar í ríkisstjórn,“ segir Dóra Björt, sem var áður forseti borgarstjórnar, í færslu á samfélagsmiðlum.

Minnir Dóra Björt á að hún hafi verið í forystuhlutverki síðustu tvö kjörtímabil og leitt Pírata til kosningasigurs, síðast með 50 prósenta fylgisaukningu. Hún hafi einnig tvisvar náð samningum um myndun fjögurra flokka meirihluta en náð að halda áherslum flokksins á lofti.

„Við höfum í góðu samstarfi náð gríðarmiklum málefnalegum árangri fyrir almenning og Pírata á þessum tíma þegar kemur meðal annars að loftslagsmálum og grænni borgarþróun, skaðaminnkun, stafrænni umbyltingu og nútímavæðingu þjónustu, lýðræðis- og gagnsæisumbótum, baráttunni gegn spillingu og aðgengi fyrir öll hvort sem það er trans fólk, fatlað fólk, fátækt fólk eða fólk sem ekki talar íslensku sem móðurmál,“ segir Dóra Björt í færslunni. „Ég er stolt af mínum verkum og hef lagt allt mitt í störf mín fyrir Pírata og fyrir borgarbúa síðustu ár til að skapa réttlátara, grænna og nútímalegra borgarsamfélag. Nú býð ég mína krafta fram til að skapa réttlátara, grænna og nútímalegra Ísland.“