Undirskriftasöfnun er hafin gegn afnám persónuafsláttar þeirra sem búsettir eru erlendis. Útborganir munu rýrast um allt að 30 prósentum.

Í desember árið 2023 samþykkti Alþingi lög um afnám persónuafsláttar lífeyrisþega sem búsettir eru erlendis. Gildistöku þeirra laga var frestað um eitt ár og á breytingin að taka gildi 1. janúar árið 2025.

Þingmenn Flokks fólksins hafa lagt fram frumvarp um að persónuafslátturinn haldist. Það er frumvarp um breytingu á lögum um breytingu á ýmsum lögum um skatta og gjöld o.fl., nr. 102/2023, sem Inga Sæland formaður er fyrsti flutningsmaður að.

Ráðist á þá em hafa minnst

Undirskriftalistinn fór í loftið á þriðjudag og er í gildi til 8. janúar næstkomandi. Þegar þetta er skrifað hafa 330 manns skrifað undir. Þar er krafist að frumvarp Flokks fólksins verði samþykkt.

Í tilkynningu með listanum segir að ef frumvarpið verði ekki samþykkt munu lífeyrisþegar búsettir erlendis missa persónuafsláttinn og lækka í útborgunum um allt að 30 prósent á milli mánaða.

„Fyrir er þessi hópur skertur töluvert með búsetuskerðingum og fær engar félagslegar bætur sem eru stór partur af lífeyrisbótum,“ segir í tilkynningunni. „Með þessum lögum er verið að ráðast á þá sem hafa allra minnst í ráðstöfunartekjur. Þetta er verulega ljót aðför að öryrkjum og lífeyrisþegum hjá ríkisstjórninni og ég hvet alla til kynna sér alvöru málsins og skrifa undir.“

Getur numið 65 þúsund krónum á mánuði

Á síðu Skattsins sést að persónuafsláttur á árinu 2024 getur verið allt að 64.926 krónum á mánuði eða 779.112 krónum á ári. Er því um töluverðar fjárhæðir að ræða fyrir lífeyrisþega.

Á síðunni Kalli á Spáni, sem Karl Kristján Hafsteinn Guðmundsson heldur úti, segir:

„Þessi nýju lög mismuna Íslendingum sem búsettir eru erlendis með lífeyristekjur frá Íslandi með tvennum hætti – annars vegar uppruna teknanna og hins vegar eftir tvísköttunarsamningsgerðinni á milli Íslands og búsetulandsins.“

Heimsmet í lágkúru

Auk þess að leggja fram frumvarpið hafa þingmenn Flokks fólksins barist hart gegn breytingunni. Í grein í Morgunblaðinu í janúar á þessu ári sagði Guðmundur Ingi Kristinsson, þingmaður, að ríkisstjórnin hefði sett heimsmet í lágkúru. Það er með því að beita öldruðu og veiku fólki fjárhagslegu ofbeldi rétt fyrir jól.

Sjá einnig:

Guðmundur:Fólki refsað fyrir að gefast upp á Íslandi – Nýtt heimsmet í lágkúru?

„Þau áform rík­is­stjórn­ar­inn­ar í skjóli næt­ur að fella brott per­sónu­afslátt aldraðs fólks á eft­ir­laun­um og ör­yrkja á líf­eyr­is­laun­um sem búa er­lend­is sýn­ir svart á hvítu ein­beitt­an fjár­hags­leg­an of­beld­is­hug henn­ar til þeirra sem reyna að lifa af í bútasaumuðu al­manna­trygg­inga­kerfi þeirra,“ sagði Guðmundur Ingi.

Undirskriftarlistann má nálgast hér.