Lögreglu barst tilkynning um klukkan fjögur í dag um tvo ísbirni sem tveir erlendir ferðamenn töldu sig hafa séð þegar þeir voru við Laugafell norðaustur af Snæfelli, nálægt Kirkjufossi. Lögreglan á Austurlandi greinir nú frá því að líklegt þyki að kletta- og kynjamyndir hafi villt ferðamönnunum sýn. Leit hefur því verið hætt að svo stöddu vegna myrkurs en til öryggis verður leit haldið áfram þegar birtir.
Tilkynning lögreglu:
„Lögreglu barst tilkynning um klukkan fjögur í dag frá tveimur erlendum ferðamönnum er verið höfðu við Laugafell norðaustur af Snæfelli, nærri Kirkjufossi, um tvo ísbirni á því svæði. Ferðamennirnir höfðu horfið óttaslegnir af vettvangi en gátu gefið upplýsingar um staðsetningu sína er þeir töldu sig verða ísbjarnanna varir, þá í rétt um þrjú hundruð metra fjarlægð.
Í kjölfarið var kannað af lögreglu hvort einhverjir væru í skálum við Laugafell og Snæfell. Svo reyndist ekki vera. Þyrla landhelgisgæslu var ræst út auk þess sem starfsmenn Landsvirkjunar könnuðu í vefmyndavélum fyrirtækisins, staðsettar nálægt þeim stað er ísbirnirnir áttu að hafa sést, hvort eitthvað markvert væri að sjá. Svo var ekki.
Lögreglumenn fóru og til leitar á þeim stað sem ferðamennirnir tilgreindu. Spor eftir ferðamennina fundust en engin önnur þar í kring, hvorki eftir stór dýr eða smá. Þyrla gæslunnar kom á vettvang um klukkan 19 í kvöld og fór yfir stórt leitarsvæði með nætursjónauka. Ekkert fannst.
Margvíslegar kletta- og kynjamyndir eru á leitarsvæðinu og snjór yfir sem getur villt óvönum sýn. Talið er að það hafi gerst að þessu sinni.
Leit hefur nú verið hætt vegna myrkurs en til öryggis verður henni fram haldið í birtingu í fyrramálið með þyrlu gæslunnar ef veður leyfir.“
