Í tilkynningu frá Hjálparstarfi kirkjunnar kemur fram að hollvinir starfsins muni koma saman að nýju næstkomandi mánudag 29. janúar.

Í tilkynningunni kemur fram að Vinir Hjálparstarfsins muni fræðast um starfið og stilla saman strengi, í safnaðarheimili Grensáskirkju mánudaginn 29. janúar kl. 12:00 og snæða saman. Öll sem áhuga hafa á starfi Hjálparstarfs kirkjunnar og vilja leggja starfinu lið eru hjartanlega velkomin, segir í tilkynningunni.

Tilkynna þarf þátttöku á netfangið help@help.is eða í síma 528 4400 fyrir kl. 9:00 fimmtudaginn 25. janúar, þ.e.a.s. á morgun. Verð fyrir máltíðina er 3.000 kr. og mun afraksturinn renna til Hjálparstarfs kirkjunnar.

Í tilkynningunni kemur fram að yfir hádegisverðinum muni Kristín Ólafsdóttir, verkefnastjóri erlendra verkefna hjá Hjálparstarfinu, flytja stutt erindi um mannúðaraðstoð Alþjóðlegs hjálparstarfs kirkna – Act Alliance, á Gasa og í Úkraínu. Mögulegt verði að spyrja hana út í einstök atriði og eiga samtal um starf Hjálparstarfs kirkjunnar á þessum ófriðarsvæðum.

Í tilkynningunni segir að hugmyndin að baki samveru vina Hjálparstarfsins sé að fólk geti hist stutt í hádeginu, borðað saman og rætt málefni Hjálparstarfs kirkjunnar og hvernig hver og einn og hópurinn í heild sinni geti stutt við starfið.

Nánari upplýsingar veitir Þorvaldur Víðisson prestur í Fossvogsprestakalli, Bústaðakirkju og Grensáskirkju.