Blaðamannafélag Íslands fagnar því að Lögreglustjórinn á Norðurlandi eystra hafi fellt niður rannsókn á hendur blaðamönnum. Rannsóknin hafi verið tilhæfulaus og grafið undan trausti.

„Líkt og BÍ hefur bent á frá upphafi rannsóknarinnar var aldrei grundvöllur til hennar enda beindist hún að þeirri háttsemi blaðamanna að taka við upplýsingum frá heimildarmönnum um samfélagslega mikilvæg málefni og miðla þeim til almennings með ábyrgum hætti,“ segir í yfirlýsingu félagsins. „Í því felst ekki refsiverð háttsemi blaðamanna heldur þvert á móti stjórnarskrárvarin frumskylda blaðamanna í lýðræðislegu þjóðfélagi.“

Farið er hörðum orðum um embætti lögreglustjórans, sem Páley Borgþórsdóttir situr í. Sagt er að um margra ára skeið hafi lögreglustjórinn haft blaðamenn til rannsóknar fyrir að sinna starfi sínu. Þetta hafi bæði haft áhrif á líf þeirra sem og skapað réttaróvissu og haft víðtæk fælingaráhrif. Þó það sé von BÍ að þetta hafi ekki verið eitt af markmiðunum með rannsókninni þá sé erfitt að útiloka að það hafi einmitt verið raunin.

„Yfirlýsing sem lögreglustjórinn á Norðurlandi eystra birti opinberlega fyrr í dag um niðurfellingu málsins er ekki til þess fallin að eyða framangreindum vafa og endurheimta það traust sem fyrri framganga embættisins í málinu hefur grafið undan,“ segir í yfirlýsingunni. „Í yfirlýsingunni, sem fá ef nokkur fordæmi eru fyrir í íslenskri réttarframkvæmd, felst ekki hlutlæg greinargerð um lyktir málsins heldur er þar þvert á móti staðhæft að „allir sakborningar í málinu gætu hafa sýnt af sér atferli sem getur flokkast undir brot á [228. og 229. gr. almennra hegningarlaga]“. BÍ lýsir furðu sinni á þessari yfirlýsingu lögreglustjórans á Norðurlandi eystra sem er hvorki í samræmi við niðurstöðu embættisins í málinu né almennar starfsskyldur þess.“

Að lokum er sagt að BÍ muni aðstoða blaðamennina að leita réttar síns kjósi þeir að gera það. Einnig verið lagt mat á það hvernig brugðist verði við þessu fordæmalausa máli.