Þau tíðindi hafa orðið í stóra fíkniefnamálinu, sem varðar meinta ólöglega starfsemi 18 manna hóps, að einn sakborningurinn hefur játað þá ákæruliði sem beinast að honum. Þetta staðfestir Karl Ingi Vilbergsson, saksóknari hjá Embætti héraðssaksóknara.
Þetta leiðir til þess að mál þessa manns hefur verið klofið frá málinu í heild og verður réttað gegn honum sér. Fyrirtaka í máli hans var við Héraðsdóm Reykjavíkur í dag.
Við þingfestingu málsins, 12. ágúst síðastliðinn, mættu 15 sakborningar af 18 og neituðu allir sök. Ákæran varðar meðal annars skipulagða brotastarfsemi, peningaþvætti og fíkniefnasölu.
Maðurinn sem hér um ræðir er eini sakborningurinn sem hefur játað sök. Hann er ákærður fyrir peningaþvætti, umferðarlagabrot og fíkniefnabrot. Er honum gefið að sök að hafa fimmtudaginn 19. október árið 2023 móttekið 12 milljónir og 396 þúsund krónur í reiðufé, sem var afrakstur brotastarfsemi, frá öðrum sakborningi í málinu, á bifreiðaverkstæðinu Bílavogur við Auðbrekku 17 í Kópavogi.
Hann er sagður hafa geymt peningana í bíl sem hann ók sviptur ökurétti og óhæfur til að stjórna bílnum örugglega vegna vímuáhrifa, um Álfabakka til móts við Sambíóin, en þar stöðvaði lögregla aksturinn. Hann er sagður hafa haft í vörslu sinni 9 töflur af lyfseðilsskyldu róandi lyfi.
Hann er ennfremur ákærður fyrir að hafa haft tæplega 30 grömm af amfetamíni á heimili sínu í Yrsufelli, en lögregla gerði húsleit þar.
Aðalmeðferð málinu í heild, fyrir utan þennan hluta, verður 21. október við Héraðsdóm Reykjavíkur.
