Fjórir eru látnir og tugir særðir eftir skotárás í menntaskóla í Georgíu fylki í Bandaríkjunum í morgun. Árásarmaðurinn er talinn vera fjórtán ára drengur.

Árásin átti sér stað í Apalachee menntaskólanum í bændum Winder, nálægt borginni Atlanta í Georgíu. Samkvæmt fréttastofunni CNN er einn í haldi. Talið er að það sé 14 ára drengur en ekki er vitað hvort hann sé nemandi í skólanum.

„Það sem við sjáum fyrir aftan okkur í dag er illska,“ sagði Jud Smith, lögreglustjóri, þegar hann ræddi við fréttamenn.

Talið er að um 30 hafi særst í árásinni og hafa að minnsta kosti 9 verið fluttir á spítala. Bæði er um að ræða fullorðna og börn.

„Við getum ekki haldið áfram eins og þetta sé venjulegt,“ sagði Joe Biden Bandaríkjaforseti þegar hann gaf yfirlýsingu um árásina og vottaði aðstandendum samúð sína. „Eftir áratugi af aðgerðaleysi verða Repúblíkanar á Bandaríkjaþingi að segja: Nú er komið nóg, og vinna með Demókrötum að því að búa til eðlilega byssulöggjöf.“