Upp úr sauð við eina af lokunarstöðvum sem sett var upp vegna Reykjavíkurmaraþonsins um helgina. Eins og DV greindi frá sakaði Steingrímur Ólafsson, sjálfboðaliði, athafnamanninn Svein Elías Elíasson um að hafa keyrt á sig við við bensínstöð N1 við Hringbraut. Í frétt DV um helgina sagði Steingrímur að Sveinn Elías, sem vakti þjóðarathygli þegar hann keyrði um með einkanúmerið NO1DAD á árum áður, hefði verið ósáttur við að vera ekki hleypt í gegnum lokunarstöðina, ausið yfir hann svívirðingum og endað með að keyra á sig með þeim afleiðingum að hann hafi orðið lemstraður eftir atganginn, með verki og rispaður á hnjánum. Sagðist Steingrímur ætla að kæra atvikið til lögreglu.

Sveinn Elías hafi hins vegar allt aðra sögu að segja. Hann hafi þurft að komast í gegnum lokunarstöðina til þess að ná í úlpu og síma sonar síns í bensínstöðinni en Steingrímur hafi sýnt af sér ógnandi hegðun og dónaskap og tjónað bílinn hans. Sagðist Sveinn ekki hafa getað bakkað út af öðrum bíl og til að forða frekari tjóni hafi hann keyrt áfram í gegnum lokunarstöðina. Kvaðst Sveinn ætla að kæra Steingrím fyrir eignaspjöll vegna tjóns sem hann olli á bifreiðinni.

Hér má lesa nánari útskýringar Steingríms og Sveins Elíasar af atburðarásinni.

Við vinnslu fyrri fréttar bárust DV tvö stutt myndbönd sem sýndu þó ekki alla atburðarásina. Í kjölfar birtingu fréttarinnar barst hins vegar lengra myndband af atburðarásinni þar sem sjá má hvað gekk á við lokunarstöðina.

Myndbandið má sjá hér:

marathon.mp4

Þetta var þó ekki eina atvikið um helgina þar sem keyrt var á sjálfboðaliða maraþonsins. Vísir greindi frá því að óþolinmóður ökumaður hefði keyrt utan í brautarvörðinn Söndru Rós Hrefnu Jónsdóttur þar sem hún var við störf á Seltjarnarnesi. Sandra, sem slasaðist í atvikinu, sagði ökumanninn einnig hafa ógnað sér ítrekað. Leitaði hún vitna að atvikinu til þess að fara lengra með málið.