Umfangsmikil lögregluaðgerð átti sér stað við Snorrabraut fyrr í dag en í aðgerðinni var maður handtekinn sem tengist rannsókn á andláti hjóna í Neskaupstað. Í umfjöllun Mbl.is um málið kemur fram að Lögreglan á höfuðborgarsvæðinu hafi aðstoðað kollega sína á Austurlandi við að hafa uppi á hinum grunaða sem talinn var vera kominn til höfuðborgarinnar. Það reyndist rétt mat og var bifreið mannsins veitt eftirför og hann handtekinn. Ekki liggur fyrir hvort maðurinn var vopnaður við handtökuna.

Sjá einnig: Eldri hjón fundust látin í heimahúsi á Norðfirði – Einn handtekinn vegna málsins í Reykjavík

Stukku út úr ómerktum bíl með sýnileg skotvopn

Fjölmargir borgarbúar urðu varir við og urðu fyrir miklum óþægindum vegna aðgerða lögreglu. Ein af þeim er Helga Birna Gunnarsdóttir sem átti leið akandi um Snorrabraut þegar mest gekk á. Víða mátti sjá sírenur í ómerktum lögreglubílum og því ljóst að eitthvað mikið var í gangi.

Helga Birna var föst á rauðu ljósi á Snorrabraut  þegar hún varð vör við merktan lögreglubíl koma brunandi fyrir aftan sig með sírenurnar á fullu. Hún vék þá fyrir bílnum upp á gangstétt en í humátt lögreglubílsins kom hvít Tesla-bifreið sem stoppaði við hlið bifreiðar Helgu Birnu.

Út úr bifreiðinni stukku tveir menn með skammbyssur sínar vel sýnilegar sem gerði það verkum að Helgu Birnu dauðbrá. „Annar þeirra er alveg upp við rúðuna á bílnum mínum og gjóar á mig augunum með hönd á byssunni. Ég hélt hreinlega að þetta yrði mitt síðasta,” segir Helga Birna sem enn er slegin yfir upplifuninni. Mennirnir hlupu síðan framhjá bifreiðinni en skömmu síðar áttaði Helga Birna sig á því að um óeinkennisklædda lögreglumenn var að ræða.

Börn urðu vitni að atganginum

Undanfarin ár hefur reglulega kviknað umræða um aukinn vopnaburð lögreglu og segist Helga Birna telja að mikill munur hefði verið á upplifun sinni ef um merkta eða einkennisklædda lögreglumenn hefði verið að ræða.

„Ég vona að þetta sé ekki eitthvað sem koma skal hér á landi.  Mér finnst að lögreglan þurfi að fara vel í gegnum verkferla og meta hvenær tilefni sé til þess að óeinkennisklæddir lögreglumenn hlaupi út úr ómerktum bílum með byssur vel sýnilegar. Það geta ekki verið eðlileg vinnubrögð nema í algjörum undantekningartilvikum,” segir Helga Birna.

Hún segir að aðrir vegfarendur hafi einnig orðið varir við atganginn, þar á meðal börn sem biðu við gangbraut.