Á þriðja tímanum síðdegis í gær var stofnaður undirskriftalisti á Ísland.is til stuðnings Helga Magnúsi Gunnarssyni vararíkissaksóknara. Ríkissaksóknari, Sigríður F. Friðjónsdóttir, hefur áminnt Helga og sent erindi til dómsmálaráðherra þess efnis að ráðherra svipti hann embætti.
Tilefnið eru ummæli Helga um innflytjendur í viðtali þar sem hann ræddi ofsóknir sýrlenska brotamannsins Mohamad Kourani í sinn garð og fjölskyldu sinnar.
Yfirskrift undirskriftalistans er eftirfarandi:
„Við undirrituð skorum á dómsmálaráðherra að hafna erindi Sigríðar J Friðjónsdóttur ríkissaksóknara um að veita Helga Magnús Gunnarsson vararíkissaksóknara lausn um stundarsakir.“
Það safnast hratt inn á stuðningslistann við Helga. Um tíuleytið í morgun voru undirskriftirnar komnar yfir 1.600 og á hádegi voru þær um 2.100.
Meðal þekktra Íslendinga sem hafa sett nafn sitt á listann eru: Inga Sæland, formaður Flokks fólksins; Kristján Hreinsson rithöfundur, Jón Axel Ólafsson fjölmiðlamaður, Bergur Konráðsson kírópraktor, Ragnar Guðni Axelsson (RAX) ljósmyndari, Frosti Sigurjónsson rekstraráðgjafi, Hödd Vilhjálmsdóttir almannatengill, Magnús Ver Magnússon aflraunamaður og Frosti Logason fjölmiðlamaður.
