Julia Sweeney, 53 ára bresk amma, hefur verið dæmd í 15 mánaða fangelsi fyrir að hvetja til þess á Facebook að moskur í heimalandi sínu yrðu sprengdar í loft upp. Ummælin lét Sweeney falla í kjölfar óreiða sem brutust út víða í Bretlandi í kjölfar hnífaárásar í Southport þann 29. júlí síðastliðinn þar sem þrjár barnungar stúlkur voru myrtar. Gaus upp mikil reiðialda í bresku samfélagi og beindust spjótin að hælisleitendum og múslimum. Óeirðir geisuðu víða um landið með tilheyrandi skemmdarverkum og ofbeldi.

Hart hefur verið tekið á þeim sem létu til sín taka í óeirðunum og hefur það vakið athygli að það gildir ekki bara um þá sem drifu sig út á götu til að brjóta allt og bramla. Það gildir líka um „lyklaborðsriddara“ eins og amman Sweeney var kölluð af dómara málsins sem lét hafa eftir sér að mikilvægt væri að slíkir einstaklingar þyrftu að horfast í augu við gjörðir sínar.

Sweeney, sem sögð er hafa lifað rólegu og einföldu lífi, varð fokreið yfir fréttaflutningi af hnífamorðunum og lét upplýsingaóreiðuna á samfélagsmiðlum hafa mikil áhrif á sig. Settist hún því við lyklaborðið og úðaði út hatursfullum færslum þar sem hún hvatti meðal annars til þess, eins og áður segir, að moskur yrðu sprengdar í loft upp. „Þetta er algjörlega fáránlegt. Ekki verja moskurnar, sprengið þær í loft upp með fullorðna fólkið innandyra,“ voru ummælin sem komu hinni rólegu ömmu í koll.

Eiginmaður Sweeney, hinn 76 ára gamli David, segir að lögreglan og réttarkerfið hafi gengið of hart fram í tilfelli eiginkonu sinnar. Þrjár lögreglubifreiðar hafi skyndilega brunað upp að heimili þar og inn þotið þrír laganna verðir til að handtaka Juliu. Fimmtán mánaða fangelsi sé svo að hans mati algjörlega yfirgengilegur dómur.

„Hún var bara að horfa á fréttirnar með mér og varð reið yfir því hvað gerðist fyrir þessar stúlkur.“ sagði Sweeney í viðtali við The Telegraph. Sagðist hann hafa reynt að eyða pósti eiginkonu sinnar en ekki haft tæknikunnáttuna til þess. Hann játaði það að hegðun eiginkonunnar hefði verið röng og mögulega verðskuldað að hún yrði dregin til ábyrgðar en að dómurinn sé að hans mati afar harkalegur.