Kona, fædd árið 1987, sem býr í einu af úthverfum Reykjavíkur, hefur verið ákærð fyrir peningaþvætti.
Í ákæru Héraðssaksóknara, sem DV hefur undir höndum, segir að konan hafi þann 21. desember árið 2022 tekið við 86.500 evrum í reiðufé frá óþekktum aðila. Jafngildir það um 13 milljónum íslenskra króna. Hafi konunni ekki getað dulist að peningarnir væru ávinningur af refsiverðum brotum. Hafi hún ætlað að flytja þá úr landi til Amsterdam í Hollandi og afhenda þá óþekktum aðila.
Konan geymdi peningana í farangri sínum en hún var stöðvuð á Keflavíkurflugvelli þann 22. desember 2022, er hún var á leið til Amsterdam með flugi. Við leit í farangri hennar fundust peningarnir.
Héraðssaksóknari krefst þess að konan verði dæmd til refsingar og greiðslu alls sakarkostnaðar. Einnig er krafist upptöku á evrunum 86.500.
Málið verður þingfest í Héraðsdómi Reykjavíkur þann 28. ágúst.
