JD Vance, öldungardeildarþingmaður og varaforsetaefni Donald Trump, lét Hollywood-stjörnuna Jennifer Aniston heyra það þegar hann var gestur spjallþáttarins Megan Kelly Show um helgina.
Upphaf rifrildisins má rekja til umdeildra ummæla Vance þar sem hann hjólaði í barnlaust fólk eins og Kamölu Harris, varaforseta Bandaríkjanna. Sagði Vance að landinu væri stjórnað af hópi barnlausra kattakvenna sem væru vansælar í eigin lífi og vegna þeirra ákvarðana sem þær hefðu tekið og vilji þeirra stæði til þess að gera allt landið vansælt líka. Auk þess að skjóta á Harris minntist hann einnig á nokkrar helstu stjörnur Demókrata eins og Pete Buttigieg og Alexandriu Ocasio-Cortez.
Jennifer Aniston, sem hefur verið opin varðandi eigin áskoranir við barneignir. Hún hafi gert allt til að verða ólétt og undirgengist allar mögulegar meðferðir til þess, vísindalegar og ekki. Var henni því mjög misboðið yfir ummælum Vance.
„Ég trúi því varla að þetta komi frá hugsanlegum varaforseta Bandaríkjanna,“ skrifaði Aniston á Instagram-síðu sína. „Það eina sem ég get sagt er… Herra Vance, ég bið þess að dóttir þín verði svo heppin að eignast eigin börn einn daginn. Ég vona að hún þurfi ekki að snúa sér að glasafrjóvgun sem valkosti. Vegna þess að þú ert að reyna að taka það frá henni líka,“ sagði leikkonan.
Vance, sem á þrjú börn með eiginkonu sinni, lét hins vegar ekki deigan síga og gerði mikið úr því að Aniston hefði dregið dóttur hans inn í málið.
„Þetta er ógeðslegt því dóttir mín er tveggja ára,“ sagði öldungardeildarþingmaðurinn. Þá þvertók hann fyrir það að standa í vegi fyrir tæknifrjóvgunum. „Eins og ég sagði í ræðunni minni þá myndi ég gera allt til að hjálpa því ég trúi því að fjölskyldur og barneignir séu af hinu góða,“ sagði Vance.
