Tilkynning barst til lögreglu og sjúkraflutningamanna á Húsavík laust eftir hádegi í um reiðhjólaslys við Jökulsárgljúfur. Þar hafði reiðhjólamaður fallið fram af kletti og þá hafði samferðamaður hans einnig slasast við að reyna að koma honum til aðstoðar.

Í færslu Lögreglunnar á Norðurlandi eystra segir að þar sem ljóst var í upphafi að erfitt gæti verið að komast til þessara aðila voru björgunarsveitir frá Húsavík, Kópaskeri og Mývatnssveit ræstar út og síðar var Akureyri bætt í þann hóp. Þá var óskað eftir aðstoð frá þyrlu LHG.

„Í ljós kom að þarna höfðu tveir hjólreiðamenn verið á leið sinni upp með Jökulsánni að vestanverðu þegar annar þeirra féll af hjóli sínu og fram af klettabrún og lenti í gróðri og grjóti þar neðan við, talsvert fall.  Viðkomandi aðili var með góðri meðvitund allan tímann en þurfti aðstoðar við.“ 

Sjúkraflutninga- og björgunarsveitarmenn voru komnir til hjólreiðamannanna um tveimur klukkustundum eftir útkall og hlúðu að þeim. Úr varð að þyrla LHG hífði þann slasaða upp til sín af þeim stað sem viðkomandi lá á í gróðrinum undir klettabeltinu.

Voru báðir hjólreiðamennirnir síðan fluttir með þyrlu LHG til Akureyrar til frekari aðhlynningar.

„Þökkum við öllum viðbragðsaðilum fyrir skjót og fagleg viðbrögð í verkefni þessu sem var við mjög krefjandi aðstæður.“