Netsvik hafa aukist gríðarlega og meðal annars er nafn Póstsins notað í svokölluðum svikapóstum til að komast yfir viðkvæmar upplýsingar. 

Fjölmargir hafa fengið sms skilaboð þar sem segir að pakki hafi ekki komist til skila þar sem húsnúmer vanti á pakkann og er viðtakandi beðinn um að smella á hlekk og uppfæra húsnúmerið. 

Á meðal þeirra sem fengu þessi svikaskilaboð er Lögreglan á Suðurnesjum.

„Það er engin afsláttur gefinn af þessu svindl rugli, sent í löggusímann rétt í þessu.

Vonandi eruð þið ekki að falla í þessa gryfju kæru vinir.

Þetta er klárlega ekki sent frá Íslandspósti,“ segir í færslu á vef Lögreglunnar á Suðurnesjum.

Á vef Póstsins má finna nokkur ráð til að varast svikapósta.

• Ekki smella á hlekki í tölvupósti til að ganga frá greiðslu. Allar greiðslur til Póstsins fara í gegnum Mínar síður.
• Netfang sendandans kemur oft upp um hann, tölvupóstur frá Póstinum hefur endinguna @postur.is eða @posturinn.is
• Skráðu þig inn á Mínar síður á posturinn.is. Þar sérðu yfirlit yfir allar sendingar sem eru til þín.

Ef svo óheppilega vill til að þú hafir þegar smellt á hlekk í svikapósti mælum við með að þú hafir samband við viðskiptabankann þinn eins fljótt og auðið er. Það væri líka vel þegið ef þú myndir áframsenda svikapóstinn á oryggi@postur.is. Þannig getum við reynt að uppræta netveiðar af þessu tagi í sameiningu.