Kristján Berg athafnamaður, sem landsþekktur er fyrir fiskverslun og sölu á heitum pottum, er afar ósáttur við starfsmenn sem tryggja sér laun án vinnuframlags með því að leggja fram læknisvottorð sem lítill grundvöllur virðist fyrir.
Kristján skrifar pistil á Facebook um þetta böl atvinnurekenda:
„Við atvinnurekendur erum fokking ROLUR.
Hvers vegna ?
Við látum launþega vaða yfir okkur.
Við uppsögn í starfi þá fáum við oft veikindavottorð frá launþegum sem duga akkúrat út uppsagnarfrestinn, þó svo uppsögnin er 2-4 mánuðir.
Læknar spila þar mikið hlutverk, þar sem hægt er að panta læknisvottorð frá þeim fyrir næstum hverju sem er.
Þú biður um veikindavottorð til 3 mánaða og læknirinn skrifar það bara út fyrir viðkomandi, þegjandi og hljóðalaust.
Við atvinnurekendur greiðum bara launin, veikindadaganna, eins og ekkert sé sjálfsagðara.
Við atvinnurekendur erum hræddir um að fólk fari út og beri okkur ekki góða sögu, drulli yfir okkur á samfélagsmiðlum og svo framvegis.
Ég hef lent í svona launþegum, OFT.
Núna á síðustu mánuðum, gerðist það, er ég sagði upp tveimur starfsmönnum.
Annar kom með vottorð 4 apríl til mín, vottorð sem á að gilda til 1 júli, sem passaði alveg uppá þann dag sem á að vera hans síðasta vinnudagur.
Hversu galið er það!!
Og hverjar eru líkurnar á því tölfræðilega séð að vottorð sem gefið er út 4 apríl dugi akkúrat, fram til 1 júli, nákvæmlega uppá sama dag og síðasti vinnudagur hans ber uppá.
Hvernig í ósköpunum sér læknirinn 3 mánuði fram í tímann, uppá dag ?
Hinn kom líka með „ótímabundið vottorð“, sem ég veit ekki hvað þýðir.
En sá aðili átti bara inni 8 veikindadaga, sem ég greiddi uppí topp.
En þar sem það var ekki nóg, þá koma reglulega hótanir til mín um boð um að ljúka málinu á friðsamlegan hátt.“
Kristján segir að hrista þurfi upp í læknastéttinni því allt of margir læknar gefi út marklaus veikindavottorð. Atvinnurekendur séu síðan of huglausir til að tjá sig um þennan vanda og það sé mikið böl:
„Stundum er best að þegja og segja ekki neitt.En ég bara get það ekki lengur vegna þess að mér finnst kerfið sem við erum búin að búa til ekki vera réttlátt gagnvart mér og mínum fyrirtækjum,“ segir Kristján en pistilinn í heild má lesa með því að smell á tengilinn hér að neðan.
