Félagið Vietnam Cuisine ehf., sem er í eigu umdeilda athafnamannsins Davíðs Viðarssonar, hefur verið úrskurðað gjaldþrota. Þetta kemur fram í auglýsingu í Lögbirtingablaðinu í dag.
Umrætt félag var starfrækt utan um rekstur veitingakeðjunnar Pho Vietnam. Reksturinn var blómlegur á pappír og skilaði fyrirtækið ætíð hagnaði og átti talsvert af eignum.
Davíð, sem áður hét Quang Lé, var handtekinn ásamt nokkrum meintum samverkamönnum sínum þann 5. mars síðastliðinn vegna gruns um umfangsmikið mansal, peningaþvætti, skipulagða brotastarfsemi og brot á atvinnuréttindum útlendinga. Var veitingastöðum Pho Vietnam lokað sem rekstri annarra fyrirtækja Davíðs. Hefur hann setið í gæsluvarðhaldi síðan og var það á dögunum framlengt til 17. júní næstkomandi. Auk Davíðs sæta bróðir hans og eiginkona einnig gæsluvarðhaldi.
