Steinunn Ólína lýsti því yfir fyrir kosningar að hún myndi bjóða sig fram til forseta færi svo að Katrín Jakobsdóttir gæfi kost á sér.
„Ég er ekki að bíða eftir rétta staðnum eða réttu stundinni til að tilkynna framboð. Ég er hins vegar að bíða eftir því hvort satt sé að sitjandi forsætisráðherra ætli að bjóða sig fram til embættis forseta Íslands. Geri hún það, þá býð ég mig fram. Það er loforð,“ sagði hún fyrir kosningar.
Það raungerðist en Katrín hlaut ekki náð fyrir augum þjóðarinnar, ekki frekar en Steinunn Ólína sem fékk 0,65% fylgi. Nú hefur Steinunn Ólína sett nýtt mál á dagskrá og lýtur það að Bjarna Benediktssyni forsætisráðherra. Segir hún að það sé „siðlaust og rangt“ að hafa hann í stól forsætisráðherra.
„Hann starfar gegn hagsmunum þjóðarinnar en fyrir þá sem eiga og ráða í íslensku samfélagi. Ríkasta fólkinu. Hann ber mikla ábyrgð á siðvillu þeirri sem breiðist út um íslenskt samfélag. Hans störf snúast nær eingöngu um sérhagsmunagæslu og arðrán á þjóðareignum. Hann gerir það hversdagslegt að svindla, pretta, meiða, ljúga og stela. Þetta er ólíðandi ómenning sem vegur að heilbrigðu hugarfari í samfélaginu.“
Steinunn Ólína vandar Sjálfstæðisflokknum ekki kveðjurnar.
„Flokkur sá sem hann leiðir sem hefur frelsi einstaklingsins að leiðarljósi er klofinn og það er frumábyrgð þess hluta flokksins sem virðist hafa einhver prinsipp að losa sig við meinsemdina. Sjálfstæðisflokkurinn getur aldrei orðið frískur með síbrotamanninn Bjarna Benediktsson innbyrðis.“
Steinunn Ólína segir að fréttamenn RÚV hafi í tvígang haldið því fram í viðtölum við hana að Bjarni hafi verið kosinn í starf forsætisráðherra.
„Þetta er einfaldlega rangt og málflutningur fréttamanna óboðlegur. Íslensku þjóðinni þvert á móti blöskrar að Bjarni sitji í þessu embætti. Þjóðin brást við stólaskiptunum með undirskriftalista tæplega 45.000 manns honum til höfuðs sem stjórnvöld og forseti höfðu að engu.“
Steinunn Ólína segir að Bjarni sé forsætisráðherra fyrir tilstuðlan fyrrum forsætisráðherra í óþökk þjóðarinnar.
„Þjóðin svaraði fyrir sig í forsetakosningum nýafstöðnum svo ekki er um að villast.
Vera hans í starfi forsætisráðherra er einfaldlega siðlaus og særandi fyrir almenning í landinu. Hvað hugsar Svandís Svavarsdóttir eftir að sjálft Ríkisútvarpið og ríkisstyrktir fjölmiðlar vógu að lýðræðinu í aðdraganda forsetakosninga? Þegar sérhagsmunaöflunum mistókst þrátt fyrir yfirgengilega grimmd og ósvífni svo ekki sé talað um fjáraustur sem þjóðinni blöskraði að kaupa sjálft forsetaembættið.“
Steinunn Ólína spyr hvort VG ætli að vera áfram skjól fyrir Bjarna. Spyr hún hvar heilindi Svandísar eru við íslenskan almenning.
„Er það bara valdasýkin útbreidda sem ræður för? Endar Svandís sinn pólitíska feril á því að selja undan okkur landið í frekara samstarfi við klofinn X-D og laskaða Framsókn?
Þorgerður Katrín var öskureið þegar frumvarp VG um lagareldi kom til 1. umræðu þingsins enda aðför að landi og þjóð. Ætlar flokkur hennar af sérgæsku að hlúa áfram að veru forsætisráðherra í stóli sínum sem stundar gripdeildir með eigur landsmanna fyrir opnum tjöldum? Kemur til greina að lýsa vantrausti á forsætisráðherra og standa með þjóðinni?
Hvað með þingmenn þá sem sofa eða eru fjarverandi meira og minna?“
Steinunn Ólína segir að það sé margt mikilvægara en stólar og völd.
„Fólki er sagt upp störfum í þjóðfélaginu og hefur lítinn rétt til varnar, það er veruleiki almennings. Það þarf ósérhlífni til að starfa að heilindum sem stjórnmálamaður sem hefur þá frumskyldu að starfa fyrir almenning í landinu. Ef heiðarlegir og velþenkjandi þingmenn og ráðherrar stöðva ekki siðspillinguna undir stjórn Bjarna Benediktssonar verður íslenska þjóðin sem fyrst að krefjast afsagnar götustráksins út Garðabænum og senda hann heim til föðurhúsanna þar sem hann við föðurkné nam fræðin.“
