Grindvíkingarnir þrír sem neituðu að rýma eftir skipun lögreglunnar eru nú á leiðinni út úr bænum. Þeir segja að lögreglan eigi ekki að ráða því hvenær þeir fara úr bænum.
„Við erum lögð af stað núna. Rafmagnið er farið og hraunið komið yfir Grindavíkurveginn. Staurarnir eru að brenna,“ segir Magnús Gunnarsson, einn af þeim sem neituðu að fara úr bænum eins og lögreglan hafði fyrirskipað. „Við nennum ekki að vera hérna í rafmagnsleysi og svo fer vatnið kannski líka.“
Lögreglan fyrirskipaði rýmingu áður en eldgosið hófst í dag og almennt gekk rýmingin vel. Greint var þó frá því að þrír íbúar hefðu neitað að fara.
Aðspurður segist Magnús ekki vera hræddur við afleiðingarnar af því að óhlýðnast lögreglunni.
„Þeir lúffuðu bara. Þeir brutust ekki inn,“ segir hann. „Við eigum heima í Grindavík. Þetta er okkar heimili. Við eigum að fá að stjórna því hvenær við förum.“
