Í aðsendri grein í Morgunblaðinu í dag gerir hún ofbeldi gegn eldra fólki að umtalsefni og vísar meðal annars í fund Landssambands eldri borgara þar sem fram kom að ofbeldi gegn eldra fólki hefði aukist.
„Slíkar fréttir valda okkur flestum óhug. Rannsóknarniðurstöður sýna að gerendur eru oftast einhverjir í innsta hring eða sá sem viðkomandi er háður og nýtur stuðnings frá. Aldraðir eru þess vegna ólíklegri til að tilkynna ofbeldið,“ segir Kolbrún í grein sinni.
Kolbrún segir að tillaga Flokks fólksins á dögunum sé lögð til sökum þess að besta forvörnin gegn ofbeldi í garð eldra fólks sé samtalið.
„Í gegnum samtalið gefst tækifæri til að kanna líðan og hlusta eftir því hvort eitthvað amar að. Margt eldra fólk í dag var alið upp við að bera harm sinn í hljóði, harka af sér og vera ekki að kvarta. Einnig var algengt að forðast það að vera byrði á öðrum,“ segir hún.
Bætir hún við að ábyrgðin sé samfélagsleg og þau sem umgangast eldra fólk þurfi að vera vakandi. Þau þurfi einnig að vera áræðin og þora að stíga fram og benda á ef þau heyra eða sjá merki um ofbeldi, ef vísbendingar eða grunur er um að aldraður einstaklingur sé beittur ofbeldi af einhverju tagi.
„Það er ekki óalgengt að þolendur ofbeldis segi ekki frá því heldur einangri sig. Þessi aldurshópur er engin undantekning á því. Auðvitað má ætla að þeir sem eru einstæðingar, eiga ekki fjölskyldu sem heimsækir þá, séu frekar einmana en þeir sem njóta stuðnings sinna nánustu. Þeir sem búa á hjúkrunarheimili geta verið einmana þótt þeir umgangist bæði annað heimilisfólk og starfsfólk. Það er nándin, tengslin og snertingin sem skiptir máli en umfram allt er það samtalið sem er besta forvörnin gegn einmanaleika.“
Kolbrún segir að eldra fólki upp til hópa, án tillits til aðstæðna og umhverfis, sárlangi í fleiri stundir til að spjalla við aðra.
„Starfsfólk hjúkrunarheimila er oft undir álagi t.d. vegna undirmönnunar og getur því ekki verið sá félagsskapur sem heimilisfólk getur átt gæðastund með. Einnig eru aðstæður nú víða þannig að meirihluti starfsfólks skilur ekki mikla íslensku og talar hana jafnvel takmarkað. Velferðartækni hefur vissulega rutt sér til rúms og skilað góðum árangri,“ segir Kolbrún og nefnir skjáheimsóknir sem dæmi um velferðartækni sem hefur skilað góðum árangri.
„Í skjáheimsókn fer fram myndsímtal milli starfsmanns heimaþjónustu og íbúa, þar sem boðið er upp á fjölbreytta þjónustu. Það geta ekki allir í þessum aldurshópi nýtt sér velferðartækni eins og gefur að skilja. Þessi aldurshópur er e.t.v. sá minnst tæknivæddi af öllum aldurshópum utan þeirra allra yngstu.“
Kolbrún bendir að lokum á að Flokkur fólksins hafi í febrúar 2023 í lagt í annað sinn til að stofnað yrði sálfélagslegt meðferðarúrræði fyrir eldri borgara sem búa á hjúkrunarheimilum eða í heimahúsi. Sú tillaga var felld.
„Nú er gerð enn ein tilraunin. Flokkur fólksins er ekki tilbúinn að gefast upp í þessu máli því það getur skipt sköpum fyrir eldra fólk að hafa einhvern að tala við, einhvern sem hlustar. Það er ekki nóg að auka eingöngu samskipti í gegnum skjáinn heldur þarf einnig að standa vörð um samveru og nálægð.“
