Brynjar skrifar færslu á Facebook og vísar í ummæli Árna Guðmundssonar forvarnarsérfræðings sem sagði í fréttum Stöðvar 2 í síðustu viku að fyrirhuguð sala Hagkaups á áfengi væri stærsta lýðheilsuslys Íslandssögunnar. Ef fer sem horfir munu viðskiptavinir Hagkaupa geta pantað áfengi og sótt í Skeifuna.
Í færslu sinni gefur Brynjar lítið fyrir þessi ummæli Árna.
„Veit ekki hvort forvarnarfulltrúinn hafi áttað sig á því að það er alger undantekning í vestrænum ríkjum og víðar að ríkið hafi einkarétt á smásölu áfengis. Skrítið að aðrar þjóðir hafi ekki áttað þig á þessari snilld í lýðheilsufræðum að ríkisvæða smásölu áfengis. Aðrar þjóðir vita eins og er að áfengi er matvara en hefur þann eiginleika, eins og t.d. sætindi, að ofneysla er hættuleg heilsu okkar,“ segir Brynjar.
Árni var ómyrkur í máli í viðtalinu við Stöð 2 og gagnrýndi forsvarsmenn Hagkaupa harðlega.
Netverslun með áfengi: Hagkaup opnar áfengisverslun í Skeifunni
„Þetta er ekki bílskúr úti á Granda sem er að selja áfengi út um bílskúrshurðina. Þetta er stórfyrirtæki, stórmarkaður og hann verður að hafa sómakennd og siðferðisstandard sem felst í því að menn fari eftir lögum. Þetta er algjörlega fyrir neðan allar hellur,“ segir Árni Guðmundsson, forvarnarsérfræðingur.
Brynjar segir að það sé einfaldur sannleikur að ofneysla og misnotkun á áfengi séu beintengd geðheilbrigði hverrar þjóðar.
„Þess vegna stöndum við, og t.d. Finnar, höllum fæti þegar kemur að áfengisneyslu og það hefur ekkert með fyrirkomulag á smásölu áfengis að gera. Það er nefnilega þannig að vín gleður mannsins hjarta og þegar mönnum líður stöðugt illa er hætt við því að þeir fái sér oftar neðan í því en æskilegt er. Aðrir halla sér sætindum, snakki og óhollu fæði í glímu sinni við vanlíðan og lenda í vítahring ofáts og ofþyngdar,“ segir Brynjar og bætir við að kannski þyki Árna rétt að ríkið hafi einkarétt á smásölu á öllum mat nema hollustufæðu.
„Ofát er nefnilega miklu meira lýðheilsuvandamál en áfengisdrykkja nú um stundir og má því ætla að menn sæki oftar í sætindi og óhollan mat í vanlíðan sinni en áfengi.“
Brynjar segir að þeim sem líður illa – og aðrir – hafi takmarkalausan aðgang að áfengi þótt einkaréttur ríkisins á smásölu sé fyrir hendi. Það sé því sjálfsblekking að halda því fram að afnám einkaréttar ríkisins á sölu áfengis muni breyta lýðheilsu þjóðarinnar til hins verra.
„Þýðir ekki að bjóða mér endalaust upp á “rannsóknir sýni” hitt og þetta. Snýst allt um geðheilbrigði og við eigum að velta fyrir okkur hvers vegna við erum svona illa stödd í þeim efnum verandi einhver drykkfelldasta og feitasta þjóð veraldar en trúum á sama tíma að við séum einna hamingjusamasta þjóðin.“
Guðmundur Ingi segir netverslun með áfengi ólöglega og skaðlega
