Maðurinn sem er í haldi lögreglu, grunaður um að aðild að þjófnaði úr peningaflutningabíl í Hamraborg, hefur áður komið við sögu lögreglu fyrir umfangsmikil innbrot fyrir rúmum áratug síðan.
Umræddur aðili bar ábyrgð á, ásamt samverkamönnum í sumum tilvikum, sannkallaðri innbrotahrinu hjá einstaklingum og fyrirtækjum á höfuðborgarsvæðinu þar sem stolið var verðmætum fyrir tugi milljóna.
Meðal annars braust maðurinn inn í ótilgreint fyrirtækjahúsnæði í Reykjavík og stal þaðan uppgjörstöskum með tæplega 3 milljónum króna í reiðufé, sem er ekki ósvipað þeim glæp sem hann er grunaður um í dag.
Hlaut maðurinn 18 mánaða fangelsisdóm fyrir umrædd brot en fyrir dómi kom fram að hann hafi verið í mikilli neyslu á þeim tíma sem afbrotin stóðu yfir og fjármagnað hana með innbrotunum og sölu á þýfi. Kom fram í dómnum að hann hefði farið í meðferð og náð að koma sér á beinu brautina.
Herma heimildir DV að að þá braut hafi maðurinn fetað í rúman áratug þar til síga fór á ógæfuhliðina að nýju. Þá hafði maðurinn byggt upp fjölskyldu og komið að rekstri fyrirtækis sem gekk vel.
Eins og komið hefur fram átti ránið sér stað þann 25. mars síðastliðinn en tveir menn brutist þá inn í peningaflutningabíl Öryggismiðstöðvarinnar sem lagt hafði verið fyrir utan veitingastaðinn Catalinu við Hamraborg í Kópavogi. Þeir tóku með sér hátt í 30 milljónir króna í uppgjörstöskum sem voru sóttar í spilakassa Happdrættis Háskóla Íslands.
Lýst var eftir mönnunum og bíl sem þeir notuðu við verknaðinn en skömmu síðar fundust áðurnefndar töskur víða í Mosfellsbæ. Í þeim hafði verið komið fyrir litasprengjum og hafði hluti þeirra sprungið og þar með litað hluta seðlanna.
Þá herma heimildir fréttastofu Vísis skömmu áður en maðurinn var handtekinn hafi litaðir peningaseðlar fundist í spilakössum á vegum Happdrættis Háskóla Íslands. Það hafi leitt til handtöku hins grunaða.
