Umdeild fréttaskýring Maríu Sigrúnar Logadóttur verður sýnd í fullri lengd í Kastljósi á mánudag. Frá þessu greinir María á Facebook.

Fyrir rúmri viku var greint frá því að María Sigrún yrði ekki í ritstjórn Kveiks þegar fréttaskýringaþátturinn snýr aftur í haust. Fram kom að ritstjóri þáttarins hafi sagt Maríu að hæfileikar hennar liggi ekki á sviði rannsóknarblaðamennsku enda hefði henni annars átt að verða ljóst að umfjöllun hennar væri ekki tilbúin til birtingar. Ætti María heldur að einbeita sér að störfum sem fréttaþula.

Málið þótti allt hið furðulegasta og kröfðust margir svara um rannsóknarefni Maríu. DV greindi frá því að þar væri um að ræða bensínstöðvalóðamál borgarinnar sem hefur verið sökuð um örlætisgerning til olíufélaga undir flaggi loftlagsstefnu og orkuskipta. Þannig hafi lóðin orðið af milljörðum í formi byggingarréttar.

Eins var ritstjóri Kveiks sakaður um kvenfyrirlitningu fyrir að tala niður hæfileika Maríu Sigrúnar í fréttamennsku, þrátt fyrir mikla reynslu hennar og menntun.