Síðustu daga hefur vorið gert vart við sig víða á landinu með mildum hitatölum og hægum vindi. Þessu hafa íbúar á suðvesturhorni landsins tekið fagnandi og er litlar breytingar að sjá í veðurkortum næstu dagana.
Sjá einnig: Siggi stormur óvenju bjartsýnn varðandi sumarið – „Ég er eiginlega í sjöunda himni yfir þessu”
Einar gerði þetta að umtalsefni á vef Bliku í gærkvöldi og vísaði meðal annars í 10 daga spá Reiknimiðstöðvar evrópskra veðurstofa.
„Í háloftunum (500 hPa) er spáð greinilegum og myndarlegum hæðarhrygg vestur af landinu og háloftlægð austur við Noreg. Vestanvindurinn er með öðrum orðum stíflaður fyrir austan Grænland.“
Ef spár ganga eftir verður hægviðrasamt að jafnaði áfram næstu daga en líklega samt norðan- eða norðaustanátt suma daga.
„Kortið sýnir líka úrkomufrávik og annars staðar en norðaustanlands (nærri Vopnafirði) er spáð afar lítilli úrkomu. Trúlega því sem næst alþurru víða um vestan- og sunnanvert landið. Gangi það eftir verður heildarúrkoma í apríl aðeins þriðjungur af meðalúrkomu í Reykjavík,“ segir Einar en nánar er fjallað um málið á vef Bliku.
Einar segir að Veðurstofa Íslands sé einnig sama sinnis en ef marka má sjálfvirkt spákort á vefnum Vedur.is verður engin úrkoma í Reykjavík eins langt og spár ná og raunar frekar bjart yfir og sólríkt.
DV ræddi á dögunum við Sigurð Þ. Ragnarsson, Sigga Storm, sem kvaðst afar jákvæður á gott sumar. Sagðist hann meira að segja halda að Íslendingar gætu jafnvel sparað sér útgjöld varðandi ferðalög til útlanda því allt benti til þess að sumarið yrði gott.
„Stóru tíðindin í langtímaspánum eru þær að það eru horfur á hlýju sumri og lítilli úrkomu. Maí verður líklega svona lala-mánuður en júní, júlí og ágúst verða prýðilegir. Það bendir allt til þess að við getum brosað hringinn og farið að dusta rykið af húsbýlum og hjólhýsum. Ég er óvenju bjartsýnn fyrir sumarið,” sagði hann.
Benti hann á að hann hefði fylgst með þessum spám í yfir 20 ár og núna væri útlitið sérstaklega bjart.
