Age Hareide, landsliðsþjálfari Íslands, gerði mögulega mistök í leik gegn Úkraínu sem fór fram í vikunni og tapaðist, 2-1.

Það þýðir að Ísland fer ekki í lokakeppni EM þetta árið en sigurlið viðureignarinnar tryggði sér farseðilinn til Þýskalands.

Helgi Fannar Sigurðsson, Hrafnkell Freyr Ágústsson og Halldór Garðar Hermannsson ræddu um leikinn í Íþróttavikunni á 433.is og höfðu sitt að segja.

Hrafnkell segir að Age hafi gert mistök með uppstillingunni í þessum leik og finnst í raun ótrúlegt að sumir leikmenn hafi ekki fengið tækifæri og ekki einu sinni af bekknum.

,,Ég verð því miður að setja spurningamerki við skiptingarnar, Willum hefur verið frábær seinni hluta undankeppninnar og fínn á móti Ísrael. Við erum með leikmann í Ajax sem er með sex mörk og fjórar stoðsendingar í deildinni, þeir fá ekki að snerta grasið,“ sagði Hrafnkell.

,,Alfreð Finnbogason þekkir þessa leiki, hann hefur skorað mörk á hæsta leveli, hann hefur skorað gegn Argentínu og í þýsku Bundesligunni. Mér fannst skrítið að vippa honum ekki inná.“