Lögreglan á Suðurnesjum segist ekki leita að kanditötum í starfið á fæðingardeildinni, en yngsta kynslóðin geti þó farið að huga að inngöngu, því nú er hægt að kaupa samfellur fyrir ungbörnin hjá tískulöggudeildinni.

„Yngja í liðinu? Nei ekki alveg en við erum farin að huga að yngstu kynslóðinni og nú geta þau farið að undirbúa sig fyrir inngöngu í lögguna nánast beint af fæðingardeildinni.

Tískulöggudeildin okkar var að taka þetta upp úr kössum og hægt að nálgast hjá okkur á Brekkustígnum í Njarðvík. Eigum þetta til fyrir 6-12 mánaða og kostar samfellan 4000 krónur.“

Lögreglubolir hafa verið vinsælir hjá börnum og þeir eru að sjálfsögðu til og einnig húfur.

„Minnum svo líka á boli og húfur fyrir eldri systkinin. Annars bara vonum við að þið eigið góða helgi og munið að fara varlega við leik og störf.“