Björgvin Gíslason, gítarleikari , er látinn 72 ára að aldri. Skilur hann eftir sig eiginkonu Guðbjörgu Ólöfu Ragnarsdóttur og þrjá uppkomna syni.
Björgvin varð bráðkvaddur í gær og greinir eiginkona hans frá andláti hans á Facebook.
„Í gær 5.mars lést elsku Björgvin minn. Missirinn er mikill og söknuðurinn sár. Elsku vinurinn minn, ég kem til með að sakna þín mikið eftir öll þessi ár sem við höfum fylgst að.“
Björgvin fæddist í Reykjavík 4. september 1951 og hóf ferilinn ungur með unglingahljómsveitunum Flamingo, Falcon, Zoo og Opus 4. Ferillinn tók síðan á sig frekari mynd með sveitunum Náttúra, Pelican, Paradís og Póker.
Björgvin er þekktastur sem gítarleikari en hann spilaði einnig á indverskan sítar, píanó og hljómborð svo dæmi séu tekin.
Björgvin gaf út sjö sólóplötur á ferlinum, þá fyrstu Öræfarokk árið 1977 og þá sjöttu og sjöundur árið 2015, tvöfalt albúm, Slettur.
